چیف جسٹس آصف سعید کھوسہ نے پولیس ریفارمز کمیٹی کی طرف سے دیئے گئے ظہرانے سے خطاب میں چند ایسے حقائق بیان کئے ہیں جو تلخ سہی لیکن ان کو جھٹلایا ہرگز نہیں جا سکتا، چیف جسٹس نے کہا کہ 16؍ دسمبر کی تاریخ ہمیں دو سانحات کی یاد دلاتی ہے۔ ایک سانحہ سقوط ڈھاکا اور دوسرا سانحہ آرمی پبلک اسکول (اے پی ایس)۔ قیام پاکستان کی تحریک مشرقی بنگال سے شروع ہوئی اور وہ ہم سے زیادہ پُر عزم تھے، ہمیں سقوط ڈھاکا سے سبق ملتا ہے کہ ریاست اور شہریوں میں سوشل کنٹریکٹ کمزور ہو تو لوگ اسے چھوڑ دیتے ہیں ریاست کو عوام کے حقوق کا بہرصورت خیال رکھنا پڑتا ہے، سانحہ اے پی ایس نے ہمیں جھنجھوڑ کر رکھ دیا۔
اس حقیقت کو کون صرف نظر کر سکتا ہے کہ جسد وطن پر لگنے والے زخموں میں سے دو زخم کبھی فراموش نہیں کئے جا سکتے شاید اس لئے بھی کہ دونوں ایک ہی دن یعنی 16؍ دسمبر کو لگے اول سقوط ڈھاکا، جب قائد کا پاکستان دو لخت ہو گیا اور دوسرا جب آرمی پبلک اسکول پشاور پر دہشت گردوں نے قیامت ڈھا دی اور ہمارے لگ بھگ ڈیڑھ سو نونہال خاک و خون میں غلطاں ہو گئے۔ یہ دونوں گھائو دوسروں سے زیادہ ہماری اپنی کوتاہیوں کا نتیجہ تھے، سقوط ڈھاکا کے مفصل جائزے سے یہی حقیقت سامنے آئے گی کہ ریاست اور شہریوں میں سوشل کنٹریکٹ کمزور تھا، آخر یہ سوشل کنٹریکٹ یا عمرانی معاہدہ ہے کیا، اسے دراصل آئین کہتے ہیں جو ریاست اور عوام کے حقوق و فرائض متعین کرتا ہے۔
