نیا پاکستان وزیراعظم عمران خان کا خواب اور حکمران پارٹی کا منشور ہے جس کے خدوخال بڑی وضاحت کے ساتھ وہ مختلف مواقع اور فورموں پر قوم کے سامنے پیش کرتے رہے ہیں۔ لاہور میں کلین اینڈ گرین پاکستان انڈیکس پروگرام کی افتتاحی تقریب سے اپنے خطاب میں بھی انہوں نے اس کا ذکر کیا ہے اور کہا ہے کہ نئے پاکستان کا تصور پہلے ذہنوں میں مرتسم ہو گا، پھر زمین پر نظر آئے گا۔ اس کے لئے پہلے ہمیں اپنا قبلہ درست کرنا ہے۔ پھر ہم مل کر نیا پاکستان بنائیں گے۔ ہم پاکستان کو ایسا ملک بنائیں گے کہ ساری دنیا اس کی مثال دے گی۔ اس ضمن میں انہوں نے ماضی میں کی جانے والی غلطیوں سے بچنے، آئین و قانون کی پاسداری، جمہوریت کے فروغ، معیشت کی بحالی اور ماحولیاتی بہتری کے لئے حکومتی اقدامات کے حوالے دیئے اور کہا کہ پاکستان میں کسی چیز کی کمی نہیں، اس کی مٹی سونا اگلتی ہے، بارہ موسموں کا یہ ملک زرعی و معدنی وسائل سے مالا مال اور سیاحوں کے لئے نہایت پُرکشش ہے۔
