All About Pakistan

دہشت گردی کا ایک ہی چہرہ نہیں ہے۔ ایک وہ ہے جس سے جسم کے پرخچے اڑ جاتے ہیں اور ایک وہ ہے جو دل کو چیر کر رکھ دیتی ہے۔ اس کی ایک ہولناک شکل تو وہ ہے جس کے مکروہ سائے پچھلے کئی برسوں سے ہمارے ملک اور معاشرے پر پڑ رہے ہیں۔ پبلک مقامات، بازار اور مارکیٹیں، کھیل کے میدان، مساجد، مزارات اور غیر مسلموں کی عبادت گاہیں، تعلیمی ادارے اور ہمارے دفاعی مراکزاس کاہدف ہیں۔ قومی تنصیبات اور نمایاں سیاسی اور سماجی شخصیات اس کی ہِٹ لِسٹ پر ہیں۔

پولیس اور فوج کے سینکڑوں جوان اس کی بھینٹ چڑھ چکے ہیں۔ ادھر ہمارا ازلی دشمن بھارت سرحدوں پر جارحانہ چھیڑ چھاڑ جاری رکھے ہوئے ہے اور ادھر ہماری بہادر افواج اس اندرونی دشمن یعنی دہشت گردی سے الجھی ہوئی ہیں۔ دہشت گردی کی اس سے بھی بڑی ایک شکل جذباتی گھاؤ لگانا ہے۔ مسلمانوں کے اللہ تعالیٰ کے بعد سب سے بڑے مرکزِ عقیدت، یعنی نبی آخرالزّماں حضرت محمد مصطفےٰ ﷺ کی شان میں زبان و قلم یا کسی بے ہودہ حرکت سے گستاخی اور ہماری متبرک و مقدس کتاب قُرآنِ کریم کی بے حرمتی کر نا اس دہشت گردی کی ایک اذیت ناک صورت ہے۔
اسی طرح ملک کے نظریاتی اور فکری وجود پر حملہ بھی دہشت گردی ہے۔ یہ دہشت گردی قیامِ پاکستان کے ساتھ ہی شروع ہو گئی تھی۔ قیامِ پاکستان کے فوراً بعد تہذیبِ مغرب کے زیرِ اثرتجدد کی لہریں اٹھنے اور سیکولرزم اور لبرل ازم کی مسموم ہوائیں چلنے لگی تھیں۔ اگرچہ میری نظر میں سلمیٰ یاسمین نجمی کا ناول ’سانجھ بھئی چودیس ‘ اس دور کا شاہکار ہے لیکن گزشتہ ساٹھ پینسٹھ برسوں میں لکھے جانے والے جن دیگرتین چار اردو ناولوں کی قارئین اور نقادوں کے حلقوں میں خوب دھوم رہی ان میں قُرۃُ العین حیدرکا ناول ’آگ کا دریا‘ بھی ایک بڑا ناول ہے۔ اس پر ایک تو ویدانت فلسفے کی چھاپ گہری ہے دوسرے یہ اس ارسٹوکریٹ طبقے کی کہانی ہے جس سے خود مصنفہ کا تعلق تھا۔

اس کے 98 ویں باب میں پاکستان کی جو منفی تصویر کھینچی گئی ہے اس میں کچھ سچائی ہے اور کچھ مبالغہ ۔ لگن اور محنت سے وطن کی خدمت کے عزم، ایثار کیشی کی تابندہ مثالوں ،مثبت قدروں اور تعمیری جذبوں کو اس تصویر میں کوئی جگہ نہیں دی گئی۔ ان کی خود نوشت ’کارِ جہاں دراز ہے ‘ پڑھیں تو پتہ چلتا ہے کہ قیامِ پاکستان کے بعد مختلف سرکاری اور غیر سرکاری اداروں میں اونچے منصبوں پرجو لوگ فائز ہوئے ان میں ایک بڑی تعداد ان کے قریب و دور کے رشتہ داروں اور ان کے خاندان سے قریبی تعلق والے سر ظفراللہ جیسے لوگوں اور اس ارسٹوکریٹ طبقے کی تھی۔ ملکی معیشت ابھی ٹھٹھری ہوئی تھی۔ ملک ابھی ٹھیک سے قدموں پر کھڑا بھی نہیں ہوا تھا۔ لاکھوں تباہ حال مہاجرین کو سر چھپانے کے لیے چھت بھی میسر نہیں آئی تھی۔ اپنے پیاروں سے بچھڑے ہوئے سینکڑوں لٹے پٹے مہاجرکیمپوں میں پڑے ہوئے تھے۔

لیکن ان لوگوں نے اپنے لیے شاندار کوٹھیاں اور بنگلے بنوانے شروع کر دیے۔ بے پناہ مراعات حاصل کر لی تھیں۔ بہانوں بہانوں سے بھاری ٹی اے ، ڈی اے کے ساتھ بیرونی ملکوں کے غیر ضروری دورے کر رہے تھے۔ اس طبقے میں مغربی تہذیب کے دلدادگان اور لبرل سوچ کا غلبہ تھا۔ بائیں بازوکے بارے میں مصنفہ بتاتی ہیں کہ پاکستان بننے کے بعد اشتراکی انٹلکچوئل انقلاب سے نا امیدہو گیا تھا۔لیکن یہ پورا سچ نہیں ہے۔ اشتراکی دانش و فکر کے لشکروں نے ابھی میدان نہیں چھوڑا تھا۔ان دنوں اخبارات کی تعداد زیادہ نہیں تھی لیکن جتنے اخبار تھے ان کو لکھنے والوں کی ضرورت تھی۔ قلم کاروں کی دنیا میں اسلامی فکر اور صالح نظریات کا خاصا کال تھا۔

اخبارات اور ادبی اور سیاسی رسالے بائیں بازو کے اہلِ قلم کی مضبوط کمین گاہیں بن گئی تھیں جہاں سے وہ پاکستان کی فکری اور نظریاتی بنیادوں پر تابڑ توڑ حملے کر رہے تھے۔فکری دھول اڑائی جا تی تھی تاکہ ’پاکستان کا مطلب کیا، لَا اِلٰہ الَا اللہ ‘کا تصور آنکھوں سے اوجھل ہو جائے اور اس مملکتِ نو زائدہ کی نظریاتی شناخت کسی کو نظر نہ آئے۔ اسلام پسندی کے رجحانات پر بائیں بازو کا یہ طائفہ اور ساتھ مغرب نواز سیکولر لبرل طبقہ پے در پے حملے کر رہا تھا۔ یورپ کے اخبارات اور رسائل کی کارٹونوں کی صورت میں پیغمبرِ انسانیت ﷺ کی شان میں گستاخی تو ابھی کل کی بات ہے ۔ ہمیں یاد پڑتا ہے کہ یہ کسی سوشلسٹ مزدور یونین کے زیرِ اہتمام چھپنے والا رسالہ تھا جس میں قیامِ پاکستان کے کچھ ہی عرصہ بعد ایک کارٹون چھاپ کر رسولِ پاک ﷺ کی شان میں سخت گستاخی کی گئی تھی۔

اس دہشت گردی کا وار سیدھا مسلمانوں کے قلب و روح پر پڑتا تھا۔ ایسی حرکتوں کا مقصد یہ جانچنا ہوتا تھا کہ مسلمان معاشرے میں دین پسندی کے رجحانات تحریکِ پاکستان کے وقت کی سطح پر ہیں یا ٹھنڈے پڑ رہے ہیں۔ یوں گویا فکری و نظر ی دہشت گردی زوروں پر تھی۔ جہاں اسلام کے خلاف کھلی دریدہ دہنی ممکن نہ ہوتی تھی وہاں ان دینی قوتوں کو طنز اور تنقید کا نشانہ بنانا ترقی پسندی کا وتیرہ بن گیا تھا جو پاکستان میں اسلامی نظام کا مطالبہ کرتی تھیں۔ جماعت اسلامی اور اس کے بانی سید ابو الاعلیٰ مودودی ؒ ہمیشہ اس فکری دہشت گردی کا ہدف رہے ہیں۔

سرد جنگ کے عرصے میں اشتراکی فکر اور مغربی تہذیب اور سرمایہ دارانہ نظام کے حامی دانشوروں میں باہم خواہ کیسی ہی فکری مناقشت رہی ہو لیکن اسلام کے خلاف ان کی سوچ اور اظہارات یکساں تھے۔ اسلامی قوتوں میں مدرسہ و خانقاہ سے نہ ان کو کبھی خطرہ رہا اور نہ ان کے ساتھ کوئی آویزش۔ دینی جماعتوں میں جدید نظریاتی فتنوں کا ادراک بھی صرف جماعت اسلامی کو تھا اور ان فتنوں کا توڑ کرنے کی علمی و فکری استعداد بھی اسی کے پاس تھی ۔

منیر احمد خلیلی
بہ شکریہ روزنامہ نئی بات

کیا منیٰ کا سانحہ مسلمانوں کے باہمی اختلافات کی دھند میں کھو جائے گا؟ کیا یہ تقدیر کا لکھا تھا؟ کیا ہم اس واقعے کا ، بطور حادثہ تجزیہ کرنے کی صلاحیت نہیں رکھتے؟

یہ محض اتفاق ہے کہ جس دن یہ حادثہ ہوا، اسی روز انٹرنیشنل نیو یارک ٹائمز میں ایک مضمون شائع ہوا جو اسی سوال کو موضوع بناتا ہے۔ مسلمان ہر وقفے کو تقدیر کا لکھا قرار دیتے ہیں اور اس سے انکی مراد یہ ہوتی ہے کہ اسکا عالم اسباب سے کوئی تعلق نہیں۔ اس مضمون میں کرین حادثے کو بنیاد بناتے ہوئے یہ بتایا گیا کہ پہلی بات اس نوعیت کے واقعے کی تحقیقات ہوئیں تو معلوم ہوا کہ اسکی ذمہ دار تعمیراتی کمپنی ہے جس نے ان حفاظتی ہدایات کا خیال نہیں رکھا جنکا احترام اس پر لازم تھا۔ مضمون نگاریوں متوجہ کرتا ہے کہ عالم اسلام میں ہر معاملے کو قسمت اور تقدیر کا لکھا قرار دینے سے خود احتسابی کی روایت آگے نہیں بڑھی اور یوں ایسے حادثات کا اعادہ ہوتا رہتا ہے۔ اسکے برخلاف جدید دنیا میں عالم اسباب میں جھانکا جاتا ہے اور یوں آنے والے دنوں میں حادثات کی تکرار نہیں ہوتی۔ مضمون کا عنوان ہے: اسلام کا المناک فلسفہ جبر

بدقسمتی سے منیٰ کے حادثے کے بعد بھی اسی فلسفہ جبر کی صدائے بارگشت سنی گئی۔ سعودی عرب کے مفتی اعظم شیخ عبدالعزیز بن عبداللہ نے حج کمیٹی کے سربراہ شہزادہ محمد بن نائف سے کہا: ‘‘ جو امور انسانی بس میں نہیں ہیں، ان کیلئے آپ کو الزام نہیں دیا جا سکتا۔ قسمت اور تقدیر کے لکھے کو ٹالنا ناممکن ہے۔‘‘ سب مسلمانوں کا اس پر ایمان ہے لیکن سوال یہ ہے کہ کس واقعے پر اسکا اطلاق ہوتا ہے اور کس پر نہیں؟ اگر اس کو بلاامتیاز مان لیا جائے تو پھر دنیا اور آخرت میں جواب دہی کا قانون بے معنی ہوجاتا ہے۔ تقدیر کے معاملات مالکِ تقدیر پر چھوڑتے ہوئے، ہمیں پانی ذمہ داری ادا کرنا پڑے گی۔ کرین کے حاثے کو بھی تقدیر پر چھوڑا جا سکتا تھا، مگر شہزادہ سلمان بن عبدالعزیز السعود نے تحقیقات کا حکم دیا۔ تعمیراتی کمپنی کو بلیک لسٹ قرار دیا۔ تحقیقات سے ثابت ہوا کہ یہ حادثہ انسانی غفلت کا نتیجہ تھا۔

جبر و قدر مذہب اور فلسفے کے معرکتہ ال آرا مضامین میں شامل ہے۔ ایک کالم میں اسکی گتھیاں سلجھائی نہیں جا سکتیں اور میں اس کی صلاحیت بھی نہیں رکھتا۔ ہمیں دیکھنا یہ ہے کہ اس فلسفے کو ہم رویہ نہیں بنا سکتے۔ جبر کی سرحد وہاں سے شروع ہوتی ہے جہاں انسانی اختیار کی سرحد ختم ہوتی ہے۔ یہ ہم نہیں جانتے کہ اختیار اور کوشش کی یہ حد کہاں تک ہے۔ یوں ہم تا دم مرگ کوشش کے پابند ہیں۔ مریض کی سانس جب تک آ جا رہی ہے، ڈاکٹر کا اختیار ختم نہیں ہوتا۔ وہ کوشش کا پابند ہے۔ وہ موت کا فیصلہ نہیں کر سکتا۔ موت کا فیصلہ عالم کا پروردگار کرت اہے اور یہاں سے جبر کا آغاز ہو جاتا ہے۔ منیٰ میں حادثہ کیوں ہوا؟ نائجیریا کی حکومت اس بات کو قبول کرنے پر آمادہ نہیں کہ اسکے حجاج اسکے ذمہ دار ہیں۔ اس لیے لازم ہے کہ اس کو تقدیر کا معاملہ قرار دینے سے پہلے عالم اسباب میں اسکی وجوہ تلاش کی جائیں۔

انتظامات حج کے باب مین سعودی حکومت کی کارکردگی غیر معمولی ہے۔ حجاج کو سہولتیں فراہم کرنے کا کام مسلسل جاری رہتا ہے اور اس میں شبہ نہیں کہ حج آسان سے آسان تر ہو رہا ہے۔ اس کے باوجود یہ ایک انسانی کاوش ہے جس میں اصلاح کا امکان ہر وقت باقی ہے۔ حجاج کی غلطیاں اپنی جگہ لیکن میرا خیال ہے کہ منیٰ جیسے حادثات متقاضی ہیں کہ انکی تحقیقات ہوں۔ ان میں علماء کے ساتھ گورننس کے ماہرین کو شامل کیا جائے اور اس بات کو ممکن حد تک یقینی بنایا جائے کہ مستقبل مین ہم ایسے حادثات سے محفوظ رہیں۔

جیسے جمعرات کو ستون کے بجائے اب دیوار کی صورت دے دی گئی اور اس کی کئی منازل بھی بنا دی گئی ہیں۔ قربانی کی عملی مشکلات کو دیکھتے ہوئے، اس معاملے میں بھی اجتہاد کیا گیا ہے۔ انسانی جانوں کی حفاظت کیلئے اس عمل کو مزید آگے بڑھایا جا سکتا ہے۔ اسکے ساتھ میرا خیال ہے کہ حجاج کی تعداد میں غیر معمولی اضافہ بھی توجہ چاہتا ہے۔ چونکہ سعودی معیشت کو اس سے غیر معمولی فائدہ ہوتا ہے، اس لیے حجاج کی تعداد میں مسلسل اضافہ ہو رہا ہے۔ اس پر بھی غور کیا جانا چاہیے کہ سعودی حکومت اتنے افراد ہی کو اجازت دے جسکا انتظام کرنا اس کے لیے ممکن ہے۔

اس حادثے پر سارا عالم اسلام افسردہ ہے، مگر ایرانی حکومت نے جس طرح اسے باہمی سیاست کی نذر کیا ، اسے افسوسناک ہی کہنا چاہیے۔ اس واقعے کو غیر ضروری طور پر اقوام متحدہ میں اٹھایا گیا۔ میرا خیال ہے کہ اس سے گریز کیا جاتا تو بہتر تھا۔ اس حادثے میں جیسے سیاست اور فرقہ واریت کو گھولا گیا، وہ میرے لیے تو تشویش کی بات ہے۔ تاہم اس سے یہ اندازہ کیا جا سکتا ہے کہ فرقہ واریت اور سیاسی اختلافات کی جڑیں اس امت کی نفسیات میں کتنی گہری ہیں۔ انکے ہوتے ہوئ ےامت کو ایک سیاسی وحدت میں بدلنے کا خواب شرمندہ تعبیر نہیں ہو سکتا۔ جو لوگ اس کے اسباب خارج میں تلاش کرتے ہیں انہیں سعودی عرب اور ایران کی اس چپقلش کا سنجیدگی سے مطالعہ کرنا چاہیے۔

ایرانی حکومت نے اس حادثے سے فائدہ اٹھاتے ہوئے اپنا دیرینہ مطالبہ دہرایا ہے کہ حج کے انتظامات عالم اسلام کی مشترکہ ذمہ داری قرار دی جائے۔ اس مطالبے کی تائید مشکل ہے۔ یہ معاملات کو مزید پیچہدہ بنانا ہے۔ سعودی عرب کی حکومت کی الجملہ ان معاملات کو خوش اسلوبی سے سرانجام دے رہی ہے۔ کسی مسلمان ملک کو اگر کوئی شکایت ہے یا اس کے پاس انتظامات کی بہتری کی کوئی تجویز ہے تو اسے سعودی حکومت تک پہنچایا جا سکتا ہے۔ اسی طرح اسے او آئی سی کے فورم پر بھی اٹھایا جا سکتا ہے۔ اسے اقوام متحدہ کے فورم پر اٹھانا جگ ہنسائی کا باعث بنے گا۔ اگر مسلمان ممالک سیاست اور مذۃب کو الگ الگ رکھ سکیں تو اس میں ہی مسلمانوں کا بھلا ہے۔

سیاست اور مذۃب کے اس ملاپ سے مسلمانوں کو بہت نقصان ہوا ہے۔ جب ان میں علیحدگی کی بات کی جاتی ہے تو میرے نزدیک اسکا مفہوم یہ نہیں ہوتا کہ سیاست و ریاست میں اسلام کی تعلیمات سے رہنمائی نہیں لینی چاہیے یہ انہیں فیصؒہ کن حیثیت نہیں دی جانی چاہیے۔ اسکا مطلب یہ ہے کہ سیاسی اور دنیاوی معاملات کو دنیاوی طریقے سے حل کرنا چاہیے اور مذہب کو اپنے سیاسی مفادات کیلئے استعمال نہیں کرنا چاہیے۔ بدقسمتی سے بعض لوگ یہ کام ایک ریاست کے اندر گروہی طور پر کرتے ہیں اور بعض اسے ریاستی حکمت عملی کا حصہ بنا دیتے ہیں۔ جیسے اب حج کے نام پر سیاست ہونے لگی ہے۔ حرمین کی تولیت عثمانیوں کے ہاتھ میں ہو گی یا آل سعود کے، انہیں اسکا سیاسی فائدہ بھی ہوگا۔ انہیں اس سیاسی فائدے سے محروم کرنے کیلئے حج کو سیاست کو موضوع بنانا افسوسناک ہے۔

منیٰ کا حادثہ ہم سب کیلئے تکلیف دہ ہے۔ ہمارے سینکڑوں حاجی ابھی تک لاپتہ ہیں۔ ہم اسے تقدیر سمجھ کر کاموش ہو سکتے ہیں پھر ہر سال ہمیں ایسے حادثے کیلئے تیار رہنا چاہیے۔ ہم اس سے سیاسی فائدہ بھی اٹھا سکتے ہیں۔ اسکے بعد ہمیں تیار رہنا چاہیئے کہ مذہب کے مسلمات بھی اختلاف کا موضوع بن جائیں۔ ہم ان باہمی اختلافات کی موجودگی میں امت مسلمہ کو ایک روحانی کے بجائے سیاسی وحدت سمجھنے پر اصرار کرسکتے ہیں۔ اسکا نتیجہ خوابوں میں رہنا ہے۔ فیصلہ اب ہمارے ہاتھ میں ہے۔

خورشید ندیم

بہ شکریہ روزنامہ دنیا

چہرہ ہو، شخصیت ہو، شہر ہو یا قصبہ۔ اگر خوبصورتی باطن میں ہو گی تو ظاہر میں بھی اسکی جھلک ہوگی۔ ہمارا چہرہ ہمارے دل کا عکاس ہوتا ہے۔ جیسے اعمال ہوں وہ شخصیت کا حصہ بن جاتے ہیں۔ بچے اسلئے خوبصورت ہوتے ہیں کہ وہ معصوم، سچے اور بے ضرر ہوتے ہیں مگر عمر اور تجربے کے ساتھ منافقت یا باطن کی خباثت چہرے اور شخصیت کو کھردرا، بد نما اور کرخت بنا دیتی ہے۔ ہمارے اکثر حکمرانوں، سیاستدانوں کے چہرے اور شخصیت میں آپ کو یہ سقم بدرجہ اتم نظر آئےگا۔

جب تک اقتدار کے جھولے جھولتے ہیں۔ تھری پیس سوٹ، ٹائیاں، چمچماتے جوتے، لیموزین، بی ایم ڈبلیو، مرسڈیز اور طیاروں، ہیلی کاپٹروں سے خوشبوﺅں میں نہا کر باہر نکلتے ہیں تو بشاشت دکھائی دیتی ہے مگر جونہی شکست و ریخت سے دو چار ہوتے ہیں۔ بیمار پڑتے ہیں یا جیل کی ہوا کھاتے ہیں تو عوام کو انکے اصلی چہرے دکھائی دیتے ہیں۔

انسان جتنا بھی بے ضمیر ہو جائے۔ اس کا لاشعور اسے کچوکے مارتا رہتا ہے بلکہ اندر ہی اندر نوچتا رہتا ہے۔ باطن اسے مضطرب رکھتا ہے۔ اکثر لوگوں کو اپنے شر، زیادتی اور حق تلفیوں یا کرپشن کا احساس اس قدر تاخیر سے ہوتا ہے کہ مداوے کی صورت نہیں بچتی، آج کل پاکستان میں پیسے کی دوڑ نے حکمرانوں، سیاستدانوں سمیت زندگی کے ہر طبقہ کو اپنے شکنجے میں جکڑ لیا ہے۔ ہر آدمی پیسے کی خاطر جھوٹ، بے ایمانی، رشوت، خوشامد، حرام اور کرپشن پر اترا ہوا ہے اونچا طبقہ جتنا کرپٹ ہے نچلا طبقہ اس سے کئی گنا زیادہ کرپٹ اور مکر باز ہے۔

پاکستان میں روزانہ سینکڑوں اور عبرتناک، غیر طبعی، حادثاتی اموات کی وجہ یہی پیسے کی دوڑ ہے۔ ہر چیز میں ملاوٹ، دھوکہ، بددیانتی اور جعلسازی ہے، ہماری معاشرتی اقدار کی اموات کا سب سے بڑا سبب پیسہ ہے اور پیسے کی دوڑ نے پاکستان سے انسانیت کو ختم کردیا ہے۔ نچلے طبقے کی کرپشن کی ایسی ہولناک کہانیاں ہیں کہ کلیجہ منہ کو آتا ہے مگر حکمرانوں اور ان نام نہاد قومی لیڈروں کو اس لئے فوکس کیا جاتا ہے کہ یہ لوگ عوام کے خون پسینے کی کمائیاں لوٹ کر کھاتے ہیں اور ڈھٹائی سے جھوٹ، فریب، حیلہ، بددیانتی کرتے ہیں۔

عوام کے پیٹ پر لات مارتے ہیں۔ عوام کے حقوق پر ڈاکہ ڈالتے ہیں اور بے شرمی سے کہتے ہیں کہ ہم عوام کی خدمت کررہے ہیں۔ ہم عوام کیلئے اپنی جان لڑا دینگے۔ ہم انصاف کیلئے عوام سے رجوع کرینگے۔ غضب خدا کا کہ جس عوام کی بوٹیاں بھی نوچ نوچ کر کھا چکے اور ہڈیاں بھی چیچوڑ چکے۔ اب کیا عوام کی ہڈیوں کا سرمہ بنا کر بیچیں گے۔ کتنے افسوس اور شرم کی بات ہے کہ اسحاق ڈار کہتے ہیں ہم نے عوام کو دیوالیہ ہونے سے بچا لیا۔ صاف کیوں نہیں کہتے کہ عوام کی ہڈیوں کا بھی دلیہ بنا لیا اور وہ بھی ڈھٹائی سے کھا لیا۔ شوکت عزیز کے بعد وہ پاکستان کے دوسرے بڑے معتوب وزیر خزانہ ہیں جنہوں نے پاکستانی عوام کی رگوں سے خون ہی نہیں نچوڑا، پانی بھی چوس لیا ہے۔ دوسری طرف انکے سمدھی وزیراعظم ہیں جو ہر وقت شہنشاہ معظم بنے رہتے ہیں۔

باراک اوباما یا ڈیوڈ کیمرون نے تو تین سالوں میں ایک بار بھی پاکستان آکر جھانکا تک نہیں مگر وزیراعظم ہر دو تین ماہ بعد امریکہ، انگلینڈ پہنچ جاتے ہیں، ستر اسی افراد کا قافلہ لےکر چل پڑتے ہیں اور سارا خرچہ قومی خزانے سے ادا ہوتا ہے۔ خاص طور پر وزیراعظم کو پاکستان میں عید منانا تو بالکل پسند نہیں یا کسی سنیاسی بابے، عامل جوتشی نے کہہ دیا ہے کہ وہ ہر عید پر ملک سے چلے جایا کریں، عیدالفطر پر تو سعودیہ چلے جاتے ہیں کہ جی عمرہ کرنا ہے حالانکہ عیدالاضحی پر بھی سعودی جا سکتے ہیں مگر ظاہر ہے کہ حج کون کرے۔ اس میں اتنے دن لگتے ہیں اور اتنی ہی محنت و مشقت بھی۔

اس لئے ہمارے اکثر قومی رہنما عمرہ پیکج پر تو بھاگ کر پہنچ جاتے ہیں مگر حج کرنے نہیں جاتے۔ وزیراعلیٰ پنجاب ایک کرشماتی شخصیت کے مالک ہیں۔ چینی وزیر نے اپنی زبان میں کہاکہ وزیراعلیٰ ایک انتہائی محنتی، ذہین اور قابل فخر وزیراعلیٰ ہیں۔ اطالوی ایلچی نے کہاکہ شہباز شریف جیسا ایک وزیراعلیٰ اگر اٹلی میں پیدا ہوتا تو آج اٹلی کی شکل بدل چکی ہوتی۔ ترکی کا صدر کہتا ہے کہ کاش ہمارا وزیراعظم شہباز شریف ہوتا۔

مذاق کی بھی ایک حد ہوتی ہے اور وزیراعلیٰ اللہ کے فضل سے اس قسم کے مذاق میں یدطولیٰ رکھتے ہیں۔ لاہور کو ہر وقت پیرس بنانے کی باتیں کرنے والے عظیم وزیراعلیٰ نے چند سڑکیں اور میٹرو بنا کر سمجھ لیا ہے کہ انہوں نے لاہور کو پیرس، فیصل آباد کو مانچسٹر، نندی پور کو لندن، ملتان کو ہانگ کانگ، بہاولپور کو بیجنگ، ساہیوال کو شنگھائی، اوکاڑہ کو ٹوکیو بنا دیا ہے، لاہور میں صرف اپنی گزر گاہوں کو ضرور خوبصورت سڑکوں اور گرین بیلٹ کا روپ دیا ہے کیونکہ یہاں سے شاہی سواری نے گزرنا ہوتا ہے ورنہ اندرون شہر تو یہ حال ہے کہ نہ پتہ یہ سڑک ہے یا فٹ پاتھ، گلی ہے یا کوئی کھڈا۔ پنجاب کے تمام اضلاع اور قصبات نوحہ کناں ہیں۔

خاص طور پر تونسہ شریف جو ڈیرہ غازی خان کی تحصیل ہے جہاں سے کھوسہ، لغاری ہمیشہ اقتدار میں رہے۔ فاروق لغاری صدر رہے۔ سابق گورنر پنجاب ذوالفقار کھوسہ، دوست محمد کھوسہ وزیراعلیٰ رہے۔

یہ جنوبی پنجاب کا پسماندہ ترین علاقہ ہے یہاں انسان اور جانوروں میں کوئی امتیاز نہیں۔ تونسہ شریف میں انسان اور جانور ایک جگہ پانی پیتے ہیں۔ اس طرف ہماری توجہ عرفان اعظم خان صاحب نے کرائی اور اس علاقے کی ایسی تصاویر بھیجی ہیں کہ دل پھٹتا ہے۔ اکیسویں صدی میں ایسے دلخراش، غیر انسانی مناظر کہ خدا یاد آجائے۔ وزیراعلیٰ کس پیرس کی باتیں کرتے ہیں۔ تونسہ شریف تو بہت دور ہے، بہت پسماندہ ہے۔ آپ تو لاہوریوں کو صاف پانی فراہم نہیں کر سکے۔ آپ کے پسماندہ پیرس میں انسانیت روتی ہے۔ آپ تقریروں، بیانات اور فوٹو سیشن سے باہر آئیں اور اس تلخ دنیا کا ادراک کریں اور سوچیں کہ یہی آپ کی وزارت اعلیٰ کا چمتکار ہے؟

ڈاکٹر عارفہ صبح خان
بہ شکریہ روزنامہ نوائے وقت

گزشتہ دنوں پاکستان میں تیار کئے گئے ڈرون طیارے ’’براق‘‘ کے شمالی وزیرستان کے علاقے شوال میں پہلے کامیاب حملے میں 3 انتہائی مطلوب دہشت گردوں کی ہلاکت کی خبریں منظر عام پر آنے اور پاکستان کا شمار لیزرگائیڈڈ میزائل سے لیس ڈرون طیارے بنانے والے ممالک میں ہونے کے بعد بھارت نے اسرائیل سے 400 ملین ڈالر کے ’’ہیرون ٹی پی ڈرون‘‘ خریدنے کا معاہدہ کیا۔ اس سے قبل بھارتی ڈرون طیارے صرف سرویلنس کی حد تک محدود تھے جنہیں بھارت نے جدید اسلحہ سے لیس کرنے کی کافی کوششیں کیں لیکن وہ ایسا کرنے میں ناکام رہا مگر پاکستان کے ڈرون طیارے کی حالیہ کامیابی کو دیکھتے ہوئے بھارت نے اسرائیل سے جدید ڈرون خریدنے کا فیصلہ کیا۔

براق، برق کی جمع ہے جس کے معنی بجلی ہے۔براق کے بارے میں قرآن پاک میں ذکر ہے کہ نبی کریمﷺ نے معراج پر تشریف لے جانے کیلئے جس سواری پر سفر کیا، وہ جنت سے بھیجا گیا جانور تھا جسے براق کہا گیا، اس لئے پاکستانی ڈرون طیارے کی صلاحیتوں کو دیکھتے ہوئے یہ نام صادق آتا ہے۔ پاکستانی ڈرون 20 سے 22 ہزار فٹ کی بلندی پر پرواز کرتے ہوئے زمین پر موجود اپنے ہدف کو 100 فیصد نشانہ بنانے کی صلاحیت رکھتا ہے۔ دنیا کے کئی ممالک کے پاس نگراں ڈرون طیارے ہیں مگر اسلحہ سے لیس ڈرون ٹیکنالوجی کے حامل صرف چند ممالک ہیں جن میں امریکہ، اسرائیل اور برطانیہ قابل ذکر ہیں جنہوں نے تنازعات کے دوران اسلحہ سے لیس ڈرون طیارے استعمال کئے لیکن اب اِن عالمی طاقتوں کی صف میں پاکستان بھی شامل ہوچکا ہے۔

ماضی میں دہشت گردی کے خلاف جنگ کے دوران پاکستانی سرحدی علاقوں میں امریکی ڈرون حملوں کے نتیجے میں عام شہریوں کی ہلاکت کے بعد پاکستانی حکومت عوام کے دبائو پر امریکہ سے یہ مطالبہ کرتی رہی کہ امریکہ، پاکستان کو ڈرون طیارے فراہم کرے تاکہ پاکستان خود دہشت گردوں کے خلاف کارروائی کرسکے مگر امریکہ ہر بار پاکستان کی درخواست مسترد کرتا رہا جس کی ایک وجہ امریکہ پر بھارتی دبائو تھا جو پاکستان کو ڈرون طیارے دیئے جانے کا حامی نہیں تھا۔

ایسی اطلاعات ہیں کہ امریکہ کے انکار کے بعد چین نے پاکستان کو ڈرون طیارے فراہم کرنے کی پیشکش کی مگر چینی ساختہ ڈرون طیارے پاکستان کے شمالی علاقوں میں مطلوبہ ضروریات پوری کرنے کی صلاحیت نہیں رکھتے تھے۔ بعد ازاں حکومت نے امریکی رویئے سے دلبرداشتہ ہوکر نیشنل انجینئرنگ اینڈ سائنٹفک کمیشن کو ذمہ داری سونپی کہ وہ پاکستان ایئر فورس کی مدد سے ڈرون طیارے کی تیاری پر کام شروع کرے۔ اس طرح اور پاکستان ایئر فورس نے 2009ء میں مقامی سطح پر ڈرون طیارے تیار کئے جنہیں ابتداء میں جاسوسی اور دہشت گردوں کی نگرانی کیلئے استعمال کیا گیا، بعد ازاں انہیں جدید لیزر گائیڈڈ میزائل سے لیس کردیا گیا۔

ڈرون طیاروں کو مسلح افواج کے حوالے کردیا گیا جس کا پہلا تجربہ انتہائی کامیاب رہا اور لیزر گائیڈڈ میزائلوں سے لیس ان ڈرون طیاروں نے کامیابی سے اپنے ہدف کو نشانہ بنایا۔ ڈرون طیاروں کے کامیاب تجربے کے موقع پر پاک فوج کے سربراہ جنرل راحیل شریف بھی موجود تھے جنہوں نے انجینئروں، سائنسدانوں اور منصوبے سے منسلک افراد کی کاوشوں کو سراہا۔ آرمی چیف کا کہنا تھا کہ براق ڈرون کی پاک فوج میں شمولیت سے نہ صرف دہشت گردی کے خلاف جنگ میں پاکستان کی صلاحیت میں اضافہ ہوگا بلکہ پاکستان دفاعی طاقت رکھنے والا اہم ملک بن کر ابھرے گا۔ 7 ستمبر 2015ء کو ایسا ہی ہوا جب براق ڈرون طیارے نے شمالی وزیرستان میں موجود دہشت گردوں کو ہزاروں فٹ بلندی سے کامیابی سے نشانہ بناکر اُنہیں کیفر کردار تک پہنچایا۔

امریکہ نے پاکستان کی سرزمین پر 2004ء سے ڈرون حملے شروع کئے۔ ان حملوں کی ابتداء جارج بش حکومت میں ہوئی جو موجودہ امریکی صدر باراک اوباما کے دوسری بار صدر بننے تک جاری رہے۔ صدر آصف زرداری کے دور حکومت میں امریکی ڈرون حملوں میں شدت آئی جن میں طالبان کے کئی سرکردہ لیڈر مارے گئے مگر دوسری جانب ان حملوں کے نتیجے میں سینکڑوں بے گناہ عام شہری بھی جاں بحق ہوئے جس کے بعد امریکی ڈرون حملوں کو شدید تنقید کا نشانہ بنایا گیا۔

اس دوران ایسی خبریں بھی سامنے آتی رہیں کہ امریکی ڈرون حملے حکومت پاکستان کی ایماء پر کئے جارہے ہیں اور پاکستان ایئرفورس، امریکی ڈرون طیارے گرانے کی صلاحیت نہیں رکھتی مگر یہ مفروضہ اُس وقت غلط ثابت ہوا جب گزشتہ دنوں پاکستان ایئر فورس نے آزاد کشمیر میں بھمبیر کے مقام پر بھارتی جاسوس ڈرون مار گرایا اور بھارت کو یہ سخت پیغام دیا کہ دشمن ملک کی جانب سے پاکستانی فضائی حدود کی خلاف ورزی کسی صورت برداشت نہیں کی جائے گی۔

آج پاکستان کی سرزمین پر امریکی ڈرون حملے تقریباً ختم ہوچکے ہیں لیکن افغانستان کے سرحدی علاقوں میں یہ حملے اب بھی جاری ہیں۔ پاکستان میں امریکی ڈرون حملے ختم ہونے کے بعد دہشت گرد شاید اس خوش فہمی میں مبتلا تھے کہ ان کے سر سے بڑا خطرہ ٹل چکا ہے مگر ان کی یہ خوش فہمی زیادہ عرصے نہ رہی اور اب پاکستانی ڈرون طیاروں نے امریکی ڈرون کی جگہ لے لی ہے۔

سرحد پار موجود ان دہشت گردوں نے افغانستان کے سرحدی علاقوں سے پاکستان میں اپنی دہشت گردانہ کارروائیاں جاری رکھی ہوئی ہیں جس کی حالیہ مثال پشاور ایئر بیس پر ہونے والا حملہ اور گزشتہ سال آرمی پبلک اسکول پشاور کا سانحہ تھا جسے افغانستان سے دہشت گردوں نے براہ راست کنٹرول کیا لیکن سرحد پار دہشت گردوں کو یہ اچھی طرح جان لینا چاہئے کہ پاکستانی ڈرون طیارے افغانستان کے سرحدی علاقوں میں موجود ان کی کمین گاہوں تک پہنچنے اور انہیں کیفر کردار تک پہنچانے کی صلاحیت بھی رکھتے ہیں۔

ایسی اطلاعات ہیں کہ بھارتی حکومت نے امریکہ سے 22 اپاچی اور 15 چنوک ہیلی کاپٹرز خریدنے کا فیصلہ کیا ہے جس کیلئے بھارتی کابینہ کی سلامتی کمیٹی نے ڈھائی ارب ڈالر کے فنڈز جاری کرنے کی منظوری دے دی ہے جس کا اعلان نریندر مودی کے دورہ امریکہ کے دوران کیا جائے گا۔ دفاعی تجزیہ نگاروں کا خیال ہے کہ ایسے وقت میں جب پاک بھارت تعلقات تنائو کا شکار ہیں، بھارت کی امریکہ سے بڑے پیمانے پر دفاعی ساز و سامان کی خریداری اور اسرائیل سے اسلحہ سے لیس ڈرون طیاروں کا حصول دونوں ممالک کے تعلقات میں مزید کشیدگی پیدا کرسکتا ہے۔

ان حالات میں پاکستان یہ سوچنے میں حق بجانب ہوگا کہ بھارت، اسرائیل سے خریدے گئے ڈرون طیاروں کو پاکستان کی حدود میں استعمال کرسکتا ہے۔ ایٹمی صلاحیت اور میزائل ٹیکنالوجی کے حصول کے بعد ڈرون ٹیکنالوجی کی صلاحیت حاصل کرنا دفاعی سطح پر پاکستان کی بہت بڑی کامیابی ہے جس پر ہمارے سائنسدان و انجینئرز خراج تحسین کے مستحق ہیں اور قوم کیلئے ہیرو کا درجہ رکھتے ہیں جن کی کاوشوں سے پاکستان اسلحہ سے لیس ڈرون بنانے والے ممالک کے کلب میں شامل ہوا۔

اشتیاق بیگ

بہ شکریہ روزنامہ جنگ

تخت بھائی کے لغوی معنی پہاڑی پر کسی قدرتی چشمے کے ہیں۔ بدھ دور کی ایک تاریخی عبادت گاہ کے دامن میں ایک قدرتی چشمہ، اب بھی موجود ہے جو سارے علاقے کو پانی فراہم کرتا ہے یہ آثار سطح زمین سے 150 میٹر کی بلندی پر واقع ہیں۔ بدھ مذہب کی چھوٹی بڑی عبادت گاہیں، خانقاہوں اور تہہ خانوں پر مشتمل ہیں۔ یہ آثار پہلی صدی عیسوی سے پانچویں صدی عیسوی تک محیط ہیں۔ تخت بھائی، صدیوں تک مٹی کے تودوں کے نیچے دبا رہا یہاں کا علاقہ چاروں طرف پہاڑیوں سے محیط ہے۔

سوات کی طرف جانے والی سڑک کے دور دور تک پہاڑی پتھریلی راہوں اور غیر ہموار پگڈنڈیوں کا ایک طویل سلسلہ ہے جو صدیوں سے قائم ہے چونکہ ایک اونچی پہاڑی کو تلاش کریہ عبادت گاہ بنائی گئی اس لیے ابھی بھی اس کے ہر طرف پہاڑوں کا ایک سلسلہ موجود ہے بیچ میں گہری کھائیاں ہیںجو قدیم دور میں اور بھی گہری ہوں گی شاید کسی کو اندازہ نہیں تھا کہ اس خاص جگہ بدھ مت کی اتنی شاندار یاد گار موجود ہے۔

صدیاں گزر گئیں حکومتیں آتی اور جاتی رہیں حملہ اور آتے رہے۔ ان ہی راہوں سے لوگ گزرتے رہے لیکن سنگلاخ پہاڑیوں میں واقع یہ وسیع عبادت گاہ عہد رفتہ کی تمام یادیں سمیٹے مٹی کے نیچے مدفن رہی۔ تاریخ کے طالب علم جانتے تھے کہ اس زمین میں پرانی تہذیبوں نے جنم لیا اور شاندار حکومتیں قائم رہیں لیکن یہ شاید کسی کے بس کا روگ نہیں تھا کہ ان پہاڑوں کو کاٹ کر نیچے کچھ تلاش کیا جائے یہ تو بڑا اچھا ہوا کہ چند مزدوروں نے جب مٹی کھود کر اس جگہ گھر بنائے تو انہیں کچھ پرانے سکے پرانی اینٹیں نظر آئیں پھر علاقے میں چھوٹے نالوں میں محکمہ آبپاشی والوں کو بدھا کی مورتیاں کچھ ٹوٹے ہوئے اعضاء اور پرانے دور کی چند اشیاء دستیاب ہوئیں چنانچہ حکومت نے ریسرچ پارٹیاں بنائیں کچھ جگہوں کو کھودا گیا اور چند ہفتوں کے بعد پتہ چلا کہ یہاں دور گم گشتہ کا ایک عظیم عہد مدفن ہے۔

اس مہم کا سہرا برطانوی دور کے ایک قابل ماہر آثار قدیمہ سرجان مارشل کے سر ہے جس نے اس سلسلے میں ٹیکسلا اور موہنجوداڑو میں بہت سی معلومات فراہم کیں اور اپنی پارٹی کے افراد کے ساتھ کام کیا۔1927ء میں یہاں زیادہ کھدائیاں ہوئیں کہ ایک دور تاریخ کے دبیز مراحل میں گم ہوگیا تھا۔ دنیا کے سامنے پہلے پہل یہاں پہنچنے کے لیے پہاڑی راستوں اور پتھروں سے گزر کر جانا پڑتا تھا۔ اب حکومت نے عبادت گاہ کے ایک طرف ایک باقاعدہ راستہ بنا دیا ہے جس کے ساتھ لوہے کا مضبوط جنگلا موجود ہے نیچے سے کھڑے ہو کر عبادت گاہ کے کھنڈرات کسی افسانوی داستان کے کردار معلوم ہوتے ہیں۔

چڑھائی پر آہستہ آہستہ جانا پڑتا ہے۔ کھنڈرات کے قریب سیڑھیاں بنا دی گئیں ہیں جو ایک سو کے لگ بھگ ہیں۔ اوپر پہنچ کر سارے علاقے کا نظارہ بڑا محسور کن لگتا ہے۔ آکاش کی وسعتوں کو چھوتے ہوئے یہ تاریخی کھنڈرات الف لیلیٰ کی داستان معلوم ہوتے ہیں یوں محسوس ہوتا ہے گویا صدیاں پلک جھپکتے گزر گئی ہوں۔ اس میلوں میں پھیلی ہوئی عبادت گاہ جو یونیورسٹی بھی تھی اب ایک اجڑا ہوا مقام، کھنڈروں اور بوسیدہ عمارتوں کا مسکن ہے جہاں مذہبی کانفرنسیں منعقد ہوتی تھیں زائرین آتے تھے شمالی ہندوستان کے دور دراز کے علاقوں سے طلباء تعلیم حاصل کرنے آتے تھے۔

راجہ کنشک اور کشن خاندان کی بے شماریادگاریں ان پتھر کے ٹیلوں اور تودوں میں موجود ہیں۔ چینی سیاح400 ق م میں بدھ مت کی مقدس زیارتوں کے لیے برصغیر آیا تو اس نے اپنی تحریروں میں شمال مغربی سرحدی صوبہ اور ٹیکسلا کا بھی ذکر کیا ہے وہ کہتا ہے اس سرزمین میں بدھ مت کی نایاب چیزیں ہیں مقدس عبادت گاہیں ہیں۔ تخت بھائی کی یونیورسٹی جہاں طلباء کی ایک کثیر تعداد بدھ مت کی تعلیم حاصل کرنے کے لیے آیا کرتی تھی کا بھی ذکر کرتا ہے ۔

(شیخ نوید اسلم کی کتاب ’’پاکستان کے آثارِ قدیمہ ‘‘ سے ماخوذ)

طالبان کی طرف سے قندوز پر قبضے کے بعد سے عالمی میڈیا میں ایک طوفان برپا ہے۔ طالبان نے یہ کام ایک ایسے وقت میں دکھایا جب دنیا بھر کے سربراہان مملکت، وزرائے اعظم اوروزرائے خارجہ اقوام متحدہ کی جنرل اسمبلی کے اجلاس میں شرکت کیلئے نیویارک میں جمع تھے۔ پاکستان کے وزیراعظم نوازشریف کی جنرل اسمبلی میں تقریر سے دو دن قبل شمالی افغانستان کے اہم ترین شہر پر طالبان کے قبضے کے بعد افغان حکومت کے نمائندے ڈاکٹر عبداللہ عبداللہ کو نیویارک میں پاکستان کیخلاف الزام تراشیوں کا جواز مل گیا اور انہوں نے اس موقع سے فائدہ اٹھانے کی بھرپور کوشش کی۔ اس سے قبل طالبان موسیٰ قلعہ پر بھی قبضہ کرچکے ہیں لیکن انہوں نے زیادہ دن یہ قبضہ برقرار نہیں رکھا۔
ہوسکتا ہے وہ چند دن میں قندوز سے بھی نکل جائیں کیونکہ اتنے بڑے شہر پر قبضہ برقرار رکھنا آسان نہیں لیکن سقوط قندوز کی ٹائمنگ نے وزیراعظم نواز شریف کیلئے بہت سے مسائل کھڑے کر دیئے۔

ایک طرف امریکی و برطانوی اخبارات میں یہ دعوے کئے جارہے ہیں کہ پاکستان میں طاقت کا اصل مرکز سیاسی حکومت نہیں بلکہ فوج ہے۔ دوسری طرف عمران خان نے نواز شریف حکومت کے خلاف اوپر تلے جلسوں کا اعلان کردیا اور تیسری طرف طالبان نے قندوز پر قبضہ کرکے افغان حکومت کیساتھ ساتھ تاجکستان اور ازبکستان کو بھی پاکستان کے بارے میں شکوے شکایتوں کے انبار لگانے کا موقع دے دیا۔ وزیراعظم نوازشریف نیویارک کے سالانہ سفارتی اجتماع میں مسئلہ کشمیر پر عالمی حمایت حاصل کرنے کی کوشش میں مصروف تھے۔ انہوں نے اپنی تقریر میں پاکستان کا موقف بھرپور انداز میں پیش بھی کردیا لیکن قندوز پر طالبان کے قبضے نے کئی عالمی رہنمائوں کے لب و لہجے کو تبدیل کردیا۔ نوازشریف سے تشویشناک لہجوں میں سوال پوچھے جانے لگے۔

ان سوالات کے جواب میں نواز شریف یہ تو نہیں کہہ سکتے کہ جائو اور یہ سوال اسی سے پوچھو جس کو تم مجھ سے زیادہ طاقتور قرار دیتے ہو کیونکہ جواب تو منتخب وزیراعظم کو ہی دینا ہے۔ نوازشریف نے افغانستان کے بارے میں کئی عالمی رہنمائوں کے تحفظات دور کرنے کی اپنے تئیں کوشش ضرور کی لیکن جب امریکی وزیر خارجہ اور بھارتی وزیرخارجہ ایک ہی زبان بولنے لگیں اور پاکستان میں کچھ کالعدم تنظیموں کے نام لے کر کہنے لگیں کہ ان تنظیموں کو نئے ناموں سے کام کرنے کی اجازت دے دی گئی ہے اور جب قندوز پر طالبان کے قبضے کے بعد ڈاکٹر عبداللہ عبداللہ یہ شور مچانے لگے کہ قندوز پرحملہ کرنے والوں میں کئی غیرملکی بھی شامل ہیں، تو پھر عالمی رہنما آپریشن ضرب عضب کی کامیابیوں کے جائز دعوئوں کو بھی شک و شبے کی نظر سے دیکھیں گے۔

صورتحال یہ ہے کہ خارجی و داخلی محاذ پر ریاست یا حکومت کی کسی کامیابی کا کریڈٹ سیاسی حکومت کو نہیں ملتا جبکہ ہر ناکامی کا بوجھ سیاسی حکومت کے کندھے پر ڈال دیا جاتا ہے۔ دوسرے الفاظ میں سیاسی حکومت صرف کمزوری نہیں بلکہ نااہلی کا مظاہرہ بھی کر رہی ہے۔

سیاسی حکومت کی سب سے بڑی نااہلی یہ ہے کہ وہ قومی معاملات پر اتفاق رائے کو برقرار نہیں رکھ سکی۔ 2014ء میں وزیراعظم نوازشریف کے خلاف لانگ مارچ اور دھرنا ہوا۔ا س مشکل وقت میں جو جماعتیں نوازشریف کے ساتھ کھڑی تھیں اب انہیں کرپشن اور دہشت گردی کےالزامات کا سامنا ہے۔ بی بی سی کے اوون بینٹ جونز نے تو یہ تک کہہ دیا کہ سابق صدر پرویز مشرف کے خلاف غداری کے الزام میں جو مقدمہ شروع کیا گیا تھا اس کی کارروائی ’’بلاک‘‘ کردی گئی ہے۔ نوازشریف اس مقدمے کو انجام تک پہنچانے کی ہمت نہیں رکھتے تھے تو انہوں نے یہ مقدمہ کیوں شروع کیا؟ مقدمے کی کارروائی ’’بلاک‘‘ ہونے کے بعد بھی انہوں نے یہ تاثر دیا کہ وہ ایک بااختیار حکمران ہیں لیکن زمینی حقائق تیزی سے تبدیل ہو رہے ہیں۔ نندی پور پاور پروجیکٹ کے افتتاح کے موقع پر شہباز شریف کی طرف سے کامیابی کے دھواں دھار دعوے نواز شریف کیلئے ندامت میں تبدیل ہوچکے ہیں۔ سانحہ ماڈل ٹائون لاہور میں 14 افراد کے پولیس کے ہاتھوں قتل کی انکوائری ابھی مکمل نہیں ہوئی اور نندی پور پاور پروجیکٹ کی انکوائری بھی شروع ہوگئی۔

اس قسم کی ہر انکوائری شہباز شریف خود شروع کراتے ہیں لیکن انکوائری یا تو کہیں پھنس جاتی ہے یا اس کی رپورٹ غائب ہو جاتی ہے۔ قصہ مختصر یہ ہے کہ ایک شریف معاملات سنبھالنے کی کوشش کرتا ہے لیکن دوسرا شریف معاملات بگاڑ دیتا ہے۔ پھربات میں سےبات نکلتی ہے۔ایک شریف طاقتور اور دوسرا شریف کمزور قرار دیاجاتا ہے۔ حالات کی نزاکت کا تقاضا کچھ اور ہے۔ آج ہمیں افراد کو نہیں اداروں کومضبوط کرنے کی ضرورت ہے۔ حکومت کو نہیں بلکہ ریاست کو مضبوط بنانے کی ضرورت ہے۔ ریاست اس وقت مضبوط ہوگی جب آئین و قانون کی بالادستی قائم ہوگی۔ آئین و قانون سب کیلئے برابرہونا چاہئے۔ ریاستی اداروں کی کامیابیوں کا کریڈٹ افراد کو نہیں اداروںکو ملنا چاہئے۔ ناکامیوں کا بوجھ صرف ایک ادارے کو نہیں بلکہ سب اداروں کو اٹھانا چاہئے۔ ہم سب کو اپنی ماضی کی غلطیوں سے سبق سیکھنا چاہئے۔

غیرضروری بحثوںاور غیرضروری تنازعات سے بچنا چاہئے۔ ان بحثوں اور تنازعات کا آخری نتیجہ شاید کسی فرد کو وقتی طور پر بہت عظیم بنا دے لیکن ’’ربط ِ ملت‘‘ کہیں کھو جائے گا۔ اپنے آپ کو تبدیلی کی موج سمجھنے والے یاد رکھیں کہ موج دریا میں رہےگی تو اس کا دبدبہ قائم رہے گا۔ دریا کے کناروں سے ٹکرا کر باہر نکلے گی تو شاید سیلاب بن کر کچھ تباہی پھیلا دے لیکن بیرون دنیا اس موج کا پانی بھاپ بن کر اڑ جاتا ہے۔ اس ناچیز نے پچھلے کالم میں بھی گزارش کی تھی کہ سیاسی حکومتوں کی کمزوریاں مارشل لا کا راستہ ہموار کیا کرتی ہیں لیکن فوج کو سیاست میں ملوث نہیں ہونا چاہئے۔ کچھ مہربان یہ سمجھتے ہیں کہ فوج کو سیاست سے دور رہنے کا مشورہ دینا فوج سے دشمنی ہے۔ یہ خاکسار تو قائداعظمؒ کا پیروکار ہے اور قائداعظمؒ کی تعلیمات میں فوج کو سیاست کی اجازت نہیں لیکن ساتھ ہی ساتھ کسی حکمران کو بھی فوج کے ساتھ سیاست نہیں کرنی چاہئے۔

کچھ قارئین نے پچھلے کالم کے حوالے سے پوچھا ہے کہ جنرل ایوب خان نے 13 بریگیڈئیروں کو نظرانداز کر کے یحییٰ خان کو میجر جنرل کیسے بنا دیا تھا؟ کیا فوج میں پروموشن میرٹ پر نہیں ہوتی؟ جواب یہ ہے کہ جناب منیراحمد منیرکی کتاب ’’المیہ پاکستان کے پانچ کردار‘‘ پڑھ لیں۔ کتاب میں جنرل یحییٰ خان کا انٹرویو شامل ہے جس میں انہوں نے خود یہ بتایا کہ جنرل ایوب خان نے انہیں وقت سے پہلے پروموٹ کردیا۔ جب پروموشن کی فائل وزیراعظم حسین شہید سہروردی کے پاس گئی تو انہوں نے ایوب خان سے پوچھا کہ آپ نے یحییٰ خان کو 13 بریگیڈیئروں پر کیوں ترجیح دی؟ تو ایوب خان نے جواب میں کہا کہ وہ 13 بھی اچھے ہیں اور یحییٰ خان بھی اچھا ہے اور سہروردی نے دستخط کردیئے۔
اسی طرح پرویز مشرف نے بھی اپنی کتاب ’’اِن دی لائن آف فائر‘‘ میں یہ الزام لگایا ہے کہ جب انہیں آرمی چیف بنایا گیا تو وہ سینیارٹی لسٹ میں تیسرے نمبر پر تھے۔

پہلے نمبر پر جنرل علی قلی خان تھے لیکن علی قلی خان کو یہ سینیارٹی جنرل عبدالوحید کاکڑ نے غلط طریقے سے دی۔ مشرف صاحب لکھتے ہیں کہ جنرل جہانگیر کرامت نے بھی میرےبجائے علی قلی خان کو ’’چیف آف جنرل اسٹاف ‘‘مقرر کردیا تاکہ ان کے بعد علی قلی خان آرمی چیف بن جائیں حالانکہ یہ میرا حق تھا تاہم نواز شریف نے علی قلی خان کی بجائے مجھے آرمی چیف بنادیا۔ میں نے یہ دونوں حوالے فوج کے دو سابق سربراہوں کے دیئے ہیں۔ صوابدیدی اختیار وزیراعظم کا ہو یا آرمی چیف کا، یہ اختیار صرف میرٹ کو سامنے رکھ کر استعما ل کیاجائے تو نتائج اچھے نکل سکتے ہیں۔اس وقت میرٹ پر عملدرآمد کی زیادہ ضرورت وزیراعظم نوازشریف کو ہے۔ انہیں اپنی کابینہ اور اہم اداروں میں میرٹ اور قانون پر سختی سے عملدرآمد کرنا ہوگا بصورت دیگر ان کی مشکلات بڑھتی جائیں گی اورکفارہ ہمیں ادا کرنا پڑے گا.

حامد میر
بہ شکریہ روزنامہ جنگ

وزیر اعظم نواز شریف نے اقوام متحدہ میں مسئلہ کشمیر اٹھایا اور شکوہ کیا کہ اقوام متحدہ نے مسئلہ کشمیر حل کرنے کیلئے جو قراردادیں پاس کی تھیں ان پر عمل نہیں ہوا جو اقوام متحدہ کی بڑی ناکامی ہے۔

چینلز اور اخبارات پر انکی تعریفیں چل رہی ہیں کہ انہوں نے کشمیر کا مسئلہ اٹھایا اور اقوام متحدہ کو بھی لتاڑا، لیکن سوال یہ ہے کہ اس تقریر کا فائدہ؟ اقوام متحدہ کو لتاڑنے کا کچھ مقصد سمجھ میں نہیں آیا تاکہ یہ ادارہ ازخود کچھ نہیں کر سکتا۔ یہ صرف وہی کچھ کرتا ہے جہاں کچھ کرنے کا اسے امریکہ حکم دے۔ مشرقی تیمور مین چند ہی برس تحریک چلی، امریکا نے حکم دیا اور اقوام متحدہ نے اسے آزادی دلوا دی۔ سوڈان کی خانہ جنگی میں اسے حکم ہوا تو جھٹ پٹ جنوبی سوڈان کو الگ کرا دیا۔ بہتر تو یہ ہے کہ وزیر اعظم یہ مطالبہ امریکہ سے کرتے۔

امریکہ سے صاف کہہ دیں کہ ہم سے ڈو مور کرانا ہے تو مسئلہ کشمیر حل کراؤ ورنہ یہ پڑا ہے تمہارا ڈو مور۔ کیا ہم ایسا کرنے کی جرائت رکھتے ہیں! اس سے زیادہ بڑا سوال یہ ہے کہ ہمین ایسا کرنے کا اختیار ہے؟

برسبیل تذکرہ آصف علی زرداری نے مہینہ بھر پہلے مطالبہ کیا تھا کہ مشرف کے خلاف اس لازام کی تحقیقات کرائی جائیں کہ انہوں نے مذکورہ قراردادون سے دستبردار ہونے کی بات کی تھی۔ سوال یہ بھی ہے کہ کیا نواز شریف کو ایسی تحقیقات کرنے کا اختیار ہے؟

کوئی اختیار نہیں تو بابا پھر ساری تقریریں بس کہانیاں ہیں۔ کہانیوں سے کچھ ہوتا تو کشمیر کب کا آزاد ہو چکا ہوتا۔ وزیرستان کے قبائلیوں نے 1948ء میں کشمیر آزاد کرا کے پاکستان کے حوالے کیا تھا، کشمیر لینا ہے تو پھر وزیرستانیوں جیسی جرائت پیدا کرو اور جب تک یہ جرائت نہیں آجاتی، اقوام متحدہ کے اجلاس میں خود مت جاؤ کسی جونئیر وزیر یا دفتر خارجہ کے افسر کو بھیج دیا کرو۔
وفاقی وزیر احسن اقبال نے سخت زیادتی کی جو عمران خان کو بوڑھا کہہ دیا۔ اپنے بیان میں انہوں نے کہا کہ بڑھاپے کی وجہ سے عمران خان کو وزیر اعظم بننے کی جلدی ہے۔

عمران کہاں بوڑھے ہوئے۔ ابھی تو انکے گرو جی بوڑھے نہیں ہوئے ۔ گرو بوڑھا نہیں ہوا تو چیلا کیسے بوڑھا ہو سکتا ہے؟ چیلوں کی ایک محفل میں انہوں نے اپنے بالوں پر ہاتھ پھیرا اور کہا کہ قدرتی کالے ہیں، بس کنپٹیوں کی طرف سے سفید رہ گئے ۔ قدرتی کالے کی بات پر ایک چیلا مسکرایا تو گرو جی ناراض ہو گئے کہا تمہیں ثبوت دکھاتا ہوں، کمانڈو ایکشن کی طرز پر پھرتی سے اٹھے اور ہیئر کلر کی وہ شیشی لے آئے جو آپ کے زیر استعمال رہتی ہے۔

اس کی ڈبیہ دکھائی جس پر موٹے الفاظ میں لکھا تھا، بال قدتری کالے یہ ثبوت دیکھ کر چیلے نے معافی مانگی۔ اچھا کیا ورنہ گروجی پا پارہ اتنا چڑھا چکا تھا کہ چیلے کا وہ حشر کر دیے کہ اسے پتا بھی نہ چلتا کہ کون سے شے اسے کہاں سے آ کر ہٹ کر گئی۔ موڈ ٹھیک ہوا تو گرو جی نے کارگل کا ذکر چھیڑا اور کہا کہ میں نے بھارت کو اسکی گردن سے پکڑ لیا تھا۔ چیلے کا جی پھر مسکرانے کو چاہا لیکن گروجی کے غصے کا خیال آیا تو ہونٹ بھینچ لئے۔ چیلے خاں جوان ہیں البتہ پہلے جیسی نہیں رہی۔ یعنی ان دنوں جیسی نہیں جس دنوں وہ میاں صلی کی حویلی جایا کرتے تھے اور انقلابی نغمے سنا کرتے تھے۔ مثلا
میں مست کڑی تو بھی مست مست منڈا ہے
میں بھی حسین تو بھی زبردست منڈا ہے

کڑی سے مراد تحریک اور منڈے سے مطلب انقلاب ہے۔ یعنی تحریک بھی مست اور انقلاب مست بھی اور زبردست بھی۔ حویلی کوئی بھی ہو، چاہے ٹیکسالی گیٹ کی چاہے راجہ بازار کی، اسکا انقلاب سے گہرا تعلق ہے۔ تو جوان خاں شروع سے انقلابی تھے لیکن انقلاب کی وہ رت نکل گئی جسکا تعلق ٹکسالی حویلی سے تھا، اب راجہ بازار کی حویلی اور اسکے لالے پر گزارا ہے۔
پاکستان کے سیکرٹری خارجہ اعزاز احمد نے کہا ہے کہ افغانستان میں کسی گروپ کا قبضہ قبول نہیں۔ آپ قندوز پر طالبان کے قبضے کی مذمت کر رہے تھے جو اگلے روز امریکا نے چھڑا لیا۔ درست فرمایا۔ افغانستان پر قبضے کا حق صرف امریکہ کو ہے۔ افغان عوام کی ہیں۔ بس ایک گروپ۔

امریکا امریکا کر بھیا
امریکہ سے ہی ڈر بھیا

محترمہ ؑاصمہ جہانگیر الطاف حسین کی وکیل کیا بنیں ایک طوفان آگیا۔ وکلا برادری نے انکے بائیکاٹ کا اعلان کر دیا۔ وکیلوں کا کہنا ہے کہ متحدہ والوں نے وکیلوں کو زندہ جلایا تھا۔ ملزم کوئی بھی ہو اور اس پر الزام کیسا ہی سنگین کیوں نہ ہوا، اسے وکیل کرنے کا حق ہے۔ عاصمہ جہانگیر کا عمل قانونی ہے اور انکے بائیکاٹ کا عمل غیر قانونی ۔ لیکن کیا کیجئے ، قانون مکافات بھی تو اپنی ایک متوازی رٹ رکھتا ہے۔

جب بھائی کے لوگوں نے کراچی میں وکیلوں کو زندہ جلایا تھا تو انہیں شاید اس رٹ کا پتا نہیں تھا یہ پتا تھا تو اسکی پروا نہیں کی۔ بہر حال زندہ جلائے جانے کے اس عمل کا گاڈ فادر تو مشرف تھا۔ اس نے ایک نہیں کئی کئی وکیل رکھے ہوئے تھے۔ وکلا برادری انکا بائیکاٹ کیوں نہیں کرتی؟
وفاقی وزیر خزانہ نے تصدیق کی ہے کہ سانحہ منی ایرانی حاجیوں کی طرف سے غلط طور پر واپس جانے کی کوشش کا نتیجہ تھا۔ انہوں نے اپنی گفتگو میں اگرچہ ایران کا نام نہیں لیا لیکن ایک ملک کے حاجیوں کی الٹے پاؤں واپسی کا ذکر کر کے واضح اشارہ دے دیا۔

ظاہر ہے یہ حاجیوں کی غلطی تھی، کوئی شرارت نہیں۔ بظاہر لگتا ہے کہ اگر کوئی سازش ہوئی تھی تو اس قسم کی کہ کسی ایرانی عہدیدار نے انہیں فورا واپسی کا پیغام دیا۔ فوری واپسی کا مقصد کیا ؟ کیا محض بھگدڑ مچانا یا بلا کر کوئی اور ایسی ہدایت دینا جیسی خمینی صاحب کے دور میں مظاہرے کرنے کی صورت میں دی گئ تھی۔ یہ واضح نہیں لیکن سازشی تھیوری کی تصدیق اس المناک حقیقت سے شاید ممکن ہے کہ سانحے میں سب سے زیادہ ایرانی حاجی کام آئے جنکی گنتی ساڑھے چارسو سے زیادہ ملتی ہے۔ اس سانحے کے بعد ایرانی خفیہ اداروں کے پانچ چوٹی کے افسر لاپتا ہیں۔

یہ کیوں وہاں موجود تھے؟ بظاہر تو لگے گا کہ حج کرنے آئے تھے لیکن بات اس وقت اسرار کے پردوں میں چھپ جاتی ہے جب یہ پتا چلتا ہے کہ یہ لوگ اپنے نام اور شناخت بدل کر آئے تھے۔ جو بھی سازش تھی، اسکا مقصد حاجیوں کی ہلاکتیں نہیں ہوسکتا تھا۔ کوئی مظاہرہ یا ہنگامہ مسلط ہو سکتا تھا تاکہ سعودی حکومت کو ہراساں کیا جا سکے لیکن وہ بات نہ ہو سکی اور اتنا بڑا المیہ ہوگیا۔ صرف یہ عہدیدار نہیں۔ ایران کے ایک سفارتکار غضنفر رکن آبادی جو لبنان میں سفیر رہے ہیں بھی شناخت بدل کر سعودی عرب آئے اور منیٰ کے سانحے میں لاپتا ہو گئے۔ ایران کے سفیر انقلاب مولانا خامنہ ای تو مسلسل سعودی عرب کی حکومت کو اس سانحے کا ذإے دار قرار دیتے ہیں لیکن انکے مقابلے مٰں انہی کے وزیر صحت حسن ہاشمی نے واضھ بیان دیا ہے کہ یہ محض ایک حادثہ تھا اور سعودی حکومت کا اس میں کوئی قصور نہیں۔

ایک کالم نویس نے حکومت کی کارکردگی پر تبصرہ کرتے ہوئے دلچسپ جملہ لکھا ہے ۔ کہا ہے ایک بھائی معاملات بگااڑنے پر لگا ہے ، دوسرا سنبھالنے میں مصروف ہے۔
تو عدم کارکردگی کا ایک نکتہ یہ بھی ہے۔ بڑا بھائی کچھ نہ کچھ کرنے کی شہرت رکھتا ہے لیکن اس بار کچھ نہیں کر رہا تو اسکی وجہ یہی لگتی ہے کہ چھوٹے بھائی کے بگاڑ کو سنبھالنے سے فرصت ملے تو کچھ کرے۔

خزانہ اجاڑ قسم کے باکار منصوبوں کا نقصان صرف یہی نہیں ہوتا کہ رقم ضائع ہوتی رہے بلکہ ہسپتالوں، تعلیمی اداروں اور دیگر سہولتوں اور ترقی کے نشانوں کی بربادی بھی ہوتی ہے۔ دیکھئے آج سرکاری سکول کھنڈر بن گئے ہیں، اب وہاں استادوں کی استادی رہی نہ شاگردوں کی شاگردی۔ ویرانوں میں بربادی کے بھوت چیختے پھرتے ہیں۔
گیلپ قسم کے ادارے بہت سروے کراتے ہیں۔ ایک سروے ہسپتالوں کا بھی کریں جہاں سہولتیں اور دوائیں نہ ہونے سے مرنے والے مریضوں کی تعداد ہمیشہ سے زیادہ ہے۔ ساتھ ہی وہ لوگوں کی دعائیں سیمپل بھی لے لیں، انہیں جاری نہ کریں، بس آرکائیو میں رکھ دیں۔

عبداللہ طارق سہیل
بہ شکریہ روزنامہ جہانِ پاکستان

Laborers move baked bricks from an oven at a kiln on outskirts of Peshawar, Pakistan.

Somewhere between two-fifths to two-thirds of all the working children in Pakistan toil in brick kilns. According to UNICEF estimates, it comes to around 250,000 children. But these are not just cases of child labour. Entire families work in brick kilns, striving to pay off their debts that are so much beyond their means that they will remain unpaid even after decades of continuous work.

The Bonded Labour System (Abolition) Act of 1992 defines this as bonded labour, where the workers enter a contract to pay off a debt and work for nominal or no wages. Even though the act banned such labour 18 years ago, practically not much has been done to eradicate this modern form of slavery. Pakistan Institute of Labour Education and Research estimates that there are 11,000 brick kilns in Pakistan. Of these, 5,000 brick kilns are in Punjab alone, mostly (about 90 per cent of them) in rural areas.

An NGO Ercelawn estimates that there are anywhere between 750,000 and 900,000 people from 200,000 families languishing in these brick kilns, most of them as bonded labourers. Ishtiaq Ahmad, a social activist who works for EAST, another NGO, said that women and children are at an elevated risk of suffering at the hands of the brick kiln owners. “Women are prepared to work at very low wages in rural areas,” he said, “The environment is very bad for these women, especially their children.”

However, bonded labour is not inextinguishable. Citing examples of some 95 families who were recently freed from bonded labour in a village near Peshawar, Ahmad said that public mobilisation was the only viable way to eradicate this evil. Four years ago a three-member bench led by the Chief Justice, Iftikhar Muhammad Chaudhry, directed all four Chief Secretaries to get all brick kilns in the country registered.